Matthew 11
Meatin Houlu Aselus Kutut Kat Iesu Ven Umen ka Selusien Onen
Iesu Selus Usil Sion Baptis a
1Navong Iesu sel kat meatin teindan elu (12) onen evus, kei sila lat keil uvaha. Ka kei mun loh kovien out enek ka va en taon sav keil en provins ten out Kaleli. Ka navong mual va, mul visein meatin keil ka vitehiten selusien onen Ahi min keil.2En avong enek, Sion Baptis mul veah en eim takeih. ▼ Kei raeng koteh usil tounah keil koa Iesu mul mumoni. Sakini, kei sila tei en meatin keil onen keke uva ven Iesu ka avahis revi usil umen onen. 3Sakini, keil umai ven Iesu ka avisi avit, “?Keik varei koa Ahi vat kati keke hesila hemai, vuo komai mehetosin meatin etai mun?”
4Ka Iesu vit kesi min keil vit, “Miheha ris ka mihehiteni min Sion asa koa meraengoni ka melesi. 5Metovar keil akilea avalele, koakeil asakras avoual amual, koakeil akur mesaien leporsi ave tahos eris, koakeil ralinge vonhon araengon tounah, koakeil umat amoul eris, ka koakeil avi livere amul along more longlongien onen Ahi. ▼ 6Ahi hetokol kat koakeil armotei en demkatien one venau.”
7Navong meatin keil onen Sion uva, Iesu selus min vangi meatin keil usili vit, “?Navong miva en out volvol keke mivales Sion Baptis, mimundemi mivales vati meatin sa? ?Miva keke mivales meatin koa rokeihtei suval oumunai tetaveah koa sakras valomal navong eang mul muhi? !Vuo! 8?Ka asa varei mivit mivaha mivalesi? ?Meatin tai koa musin en momore eisin keil? !Vuo! Veni meatin keil koa amusin mukonek aro en mari eim omon asuv houlu keil. 9?Alhiteni minau, miva keke mivales asa varei? ?Provet tai? !Anatin! Ka naviteni min kami keke meatin enek hetetamen imok mulin provet sav keil. 10Veni Sion vi tai koa Tus Votut vit usili vit,
'Kilesi. Inau nisila eiloheh onak helamu enuk.
Kei heha mau keke vasak mesen sise ten amaien onom.'(Mal 3:1)
11Anatin eli naviteni min kami, meatin sav tovuol koa avasi en out netan koa vahi hetetamen imok valin Sion Baptis. Ka meatin kuren tai koa maen Ahi ten out nesa vahi asuv houlu onen, kei marite mok mulin Sion en meten Ahi. 12En avong Sion mul vitehiten selusien onen Ahi rokol kosa, Ahi mul sakin hiasuvien onen vamai vakeih imok, ka koakeil akeih akapil ral mini. 13Veni tus keil onen provet vasi keil telamu ral min Mengkatien keil onen Mosis aselus usil hiasuvien enek onen Ahi rokol avong koa Sion mai. 14Ka munak kami mivasi kami keke mivakul anatinien eni, Sion vi Ilaetsa koa Ahi vat kati keke hesila hemai. ▼ 15Munak ralingomi mul, mihetaengon revi selusien koanik.
16“?Kami, meatin keil ten avong kosa, misuval asa? Kami misuval titiali keil koa arondan vesesal en out tahulhulien. Ka tei en keil amul avisohiso va min titiali sav keil avit,
17'?Mukave? Memusau suval mesi komai, ka kami mirvoltei.
Memurang suval melonge tisa, ka kami mirmuaitei.'
18Veni misesein inau ka Sion emun. Navong Sion Baptis emai, kei mul val ven anien keke vahis ka romuntei uaen, ka kami miseseini mivit, '!Sion, ninin tisa mul ien!' 19Ka evus, navong inau, Natin Meatin, numai, nakanian ka namun uaen. Ka kami misesein inau mivit, '!Ales meatin ekek! Kei vi meatin taanianien ka meatin tamunmunien. Kei mul vise meatin ten takis ka meatin tatisa keil en tuak.' Ka meatin keil ilei kilea isei mul musil meteisauen onen Ahi ka en heite teni koa mul kistal en moulien onen.”
Iesu Selus Keih Kat Meatin Keil koa Arkul Anatin entei Selusien Onen e
20Evus, Iesu selus keih kat meatin keil ten taon keil koa kei mumon merikel keil houlu en mete. Veni avaseini alesi, arvilestei moulien one ran sakien tatisa keil one. 21Kei viteni vit, “!Aue li! !Hetisa min kami, meatin keil ten out Korasin! !Ka hetisa mun min kami, meatin keil ten out Betseta! Veni kami milei sesein merikel koa namumoni en metomi, Ahi hesan mahien hehi houlu mok min kami. Munak meatin keil ten out Taer ka Saedon koa arvitei Siu, avales vati merikel keil koa namumoni en metomi, tuetin tuai, avasin en musi eisin ka avativin vulimeas en vate vatie lati keke avahiles ran tisaen one. 22Ka anatin eli naviteni min kami, en Avong koa ilei revi usite vasi onen meatin keil, Ahi enhemahis meatin keil ten out Taer ka Saedon helin kami. 23?Ka kami, meatin keil ten out Kapaniam, mimundemi keke Ahi hehati lat kami miheha en out nesa? !Vuo! !Kei heson kami miheha netan, en Ahang koa sakras vavus! Munak meatin keil ten out Sodom avales vati merikel keil koa namumoni en metomi, taon one val veah vatokol kosa. 24Ka anatin eli naviteni min kami, en Avong koa ilei revi usite vasi onen meatin keil, Ahi enhemahis meatin keil ten out Sodom helin kami.”Iesu San Masmasien Min Ahi ven Meatin Kuren Keil koa Amul Akul Anatin en Selusien Onen f
25En avong enek, Iesu viteni vit, “Tata, keik kovi Asuv ten out nesa ka ten out netan. Namasmasuk houlu mok veni keik koling suain tounah keil enek ran koakeil avi meteisau ka akileile. Ka korie lat aneite teni min koakeil asuval titiali koa arsukul revitei. 26Anatin Tata, koanik mul musil asa koa keik emvati vakistal. Anatin.”27Navong Iesu vis evus, viteni min meatin keil vit, “Tata onak ling tounah vasi en hek. Meatin keil arlei kileatei Natin Ahi, Tamen enges lei kilea eni. Ka meatin keil arkileatei en Ahi, Natnali enges kilea eni. Ka koakeil enges Natnali enek envati vahothot en Tamen min keil, keil emun ilea eni.
28“Almai venau, kami keil koa milonge mah ven tounah tameas koa mimul mivusi en moulien onami, ka inau nisan sehien min kami. 29Mihelong kat nau ka mihousil kat nau, veni inau namerau ka rendemien onak va netan. Hesakini, mihehotin sehien en moulien onami. 30Ven hihiseien onak rokeihtei ka tounah koa nilingi en kami keke mivoumoni hemelalas.”
Copyright information for
PMA